O-ringen 2015 Stage 3 : 說好的148究竟在哪裡？

O-ringen 2015 Stage 3 

GPS route :http://3drerun.worldofo.com/?id=-297156&type=info

Warm Up

今日我出1點幾，但我12點就到咗起點。唔知點解今日好眼訓，於是我揀咗舊啡點就爬上去訓覺。（有係GPS 錶set alarm) 有個女仔經過以為我唔舒服，問我有冇事（瑞典人真係好friendly️) 

仲有，勁黑仔:o 臨出發時，我唔小心整爛左我個提示紙套:( 成場無得用。要check code 時超麻煩，成日要unfold 翻份地圖睇。

1點時，我起身做翻熱身準備出發。

一方面沿住彩帶跑到起點，另一方面諗緊點去CP1。我第一時間就諗沿路走，去到河邊打橫去入point。可是，一路跑時，我發現一早係起點直線去可能仲快，而且更準。哎呀 但我唔想翻轉頭，唯有照原定計劃走。

去到河邊時，打橫去。我發覺好難知幾時爬翻上去入point，因為個度山咀同山窩分別不大，好難數，而且呢個部分的林能見度唔高。我行到咁上下，唔理啦，決定爬咗上去先。我見到個控制點，好興奮跑過去，點知又唔係我個個（呢個感覺好似由天堂跌落地獄咁）

我嘗試用唔同頂定位，但點都搵唔到。後來，我入到快黃地，我就知道翻自己係邊，打翻bearing 爬過一個頂就到CP1。

我再用頂，一個接一個咁過，但又唔小心走過龍。慢慢搵下搵下就比我搵到CP2了

CP3整體來說頗順利。我撞入小徑，再入大路，去到一個小loop。個度有個lost 咗嘅女仔問我係邊，呢個時候我肯定答到佢我地所在位置。佢知道後，仿然大悟的樣子令我覺得幾開心。（助人為快樂之本嘛） 

我經過小loop 沿住小徑去到白林，再沿個d 斬樹斬出來個d 路走。（要一直望上天，確保自己on track) 去到盡頭，就開始有明顯白林與其他植皮的分界。一路沿住走經過沼澤，見到有個位特別高，就知道係CP3隔離個頂。去到頂北面就係個控制點。Yay

CP4 ~ 是日經典 

（睇GPSroute #wala) 

用咗65分鐘去搵呢個咁近的控制點。

我爬過個山頂入路。我想用一個肯定的攻擊點殺入去CP4。於是，我諗住用路邊石。行極都唔覺有石，行下行下都唔見有明顯大石，仲落咗去類似黃地的地方（冇咩樹）但明明地圖話係小徑邊系白林。跟住個方向又好鬼怪（指南針唔對地圖），搞到我開始唔肯定自己係邊。唯有沿路撤返，再搵過粒石。

睇翻GPS route 原來自己出左路，真系落左黃地。姐系又有人開左路出來。

搵到粒石後，開始落返去。行下行下踩咗落沼澤。唔知點解我又開始猶豫。呀 又爬翻上去。

我決定用路邊個明顯山咀再打bearing 入。落到對面快黃地，跟住入林。好難知道自己係邊，總之方向岩就得。有倒樹我就用來定位。點知呢度有多過2棵倒樹我點知畫圖個個係計咗邊棵落圖，全部都好大棵。唔理啦 照用其中一棵打bearing 落。（旁邊都有個石群）我見到個控制點好興奮走過去，點知係147。（我要搵148) 呢個話我知我個控制點好近，但究竟係邊呢？點解我搵極都搵唔到嘅:( WHY

其實我可以出翻路用水站慢慢入翻來入point ，但我懶。唔想特登出去又入翻來。之後不斷撞不斷殺。附近究竟有咩feature, 我幾乎記熟晒，但就係搵唔到個148。

以為系148，沖過去，點知呢個系147 

我開始驚。特別我今日出得晏，剩翻係林的人唔多，應該係話係呢區得翻我一個。係我非常徬徨的時候，個林靜得恐怖。冇人可以幫我。要靠自己relocate, 再搵個god damn CP4：148。roar 

真係好驚，同時好想令自己冷靜落來。「定D嚟」

冇錯，浩賢成日話「定D嚟」

嗯。

好，我冇晒辦法啦。

唯有真係撞翻出去水站，飲啖水定下驚，再入翻去。

只有定向人明白打point 的那份成功感
與感動的心情

呢次走得非常非常慢，要確保自己每行一步都知自己係地圖邊度。過河再上頂，比我搵到149。搞錯呀 147 149都比我搵到，係搵唔到個148。

落翻頂過沼澤經過2粒明顯大石，終於比我見到個大山窩，我加快腳步走入去。搵到了！搵到了！說好的「148」。打呢個控制點個刻，我又不禁覺得非常感動。

好啦 好啦 實在花咗太多時間落呢度。要快d 搵到剩低的控制點。我出翻水站，靠左經過2個分叉口。我選擇第二條路入，因為呢條行到盡頭就可以到CP5（行左一半覺得其實第一條仲快）

睇翻GPS route 原來我無行到d 路，只系我以為自己有行到lol
另外，宜家睇翻。我覺得有更好的route choice. 無需要甘兜一個大圈，簡直浪費時間。

如計劃一樣，去到盡頭過埋沼澤就到咗CP5。

打完CP5, 我又出翻水站。（個度d helpers 望住我係呢個範圍經過無數次) 沿路一直跑去到一塊小平地。爬入白林一直望上天沿住條「路」去到水站。

繼續沿條大路去到另一個水站。又用斬樹個d 路，一路行一路睇住方向一路數住路口。去到左邊第六個，我轉入去。見到塊勁密林後，沿住佢走。見到個小丘後面個2粒石。that's CP6!

CP6宜家睇翻都覺得跑路最快CP6, 雖然我選個條路也不差，

只不過系可以早一個水站入都得。

呢個可以直線去，不過好斜。

爬緊上CP7

沿路撤返，出翻後先個水站，跑大路。去到CP7 西北個快黃地。d人已經跑左條路出來，我係下面已經見到山坡上的控制點。好興奮咁爬上去，打完又拿拿聲跑翻落來。

久違了的路邊Point

CP8 — 好耐冇見的路邊point . 

跑過橋底同馬路靠左入大路，好快見到CP9。打完出翻路繼續跑。

呢度有些白癡。見到個水池後，我兜遠左係湖另外一邊入條馬路。其實可以一早一路。呀 唔識形容呢個部分。總之上左路後，又要行翻轉頭入林。我一路跑小徑見到CP10就跑出去打。

之後，又入翻路。呢度路網有些密。（好多分叉口）要碌大對眼睇清楚，確保自己冇走錯，同保持知道自己係邊。搞掂晒堆路口，搵到CP11。

打完好興奮就開始跑。但跑左幾步，都係唔太肯定。咪咪咪 停低 都係唔好 穩陣d 翻翻CP11 攞好bearing 入翻路。見到CP12 打埋佢，就沖去打last control。

跑到終點，打finish control個刻又令我露出微笑。:) 

個一份克服困難翻到終點的成功感相信每一個定向人都曾經感受過。

而且love it ️

又完成了一個Stage。

176分鐘。退步左

今場認真覺得麻麻地。

呢次個148控制點真係好經典。

翻到去研究咗好耐究竟發生咩事。

如果唔係呢個錯，應該可以早成粒鐘翻。

Stage 4 係Middle 加上我9點開跑。

應該輕鬆得多掛

O-ringen 2015 Stage 2 : Improving

GPS route: http://3drerun.worldofo.com/?id=-297009&type=info

(睇唔清圖, 可以click 入去, zoom in)

（今場有錄影, 不過好鬼鎮，我自己都睇到頭暈，
   cap 圖比大家睇下瑞典美麗的白林也好:)

每位參賽者都收拾心情，做足熱身，準備出發。

仲有1分鐘就入格啦!

用左3次的起點

CP1 一開波就炒. yo ️

一到Start，打個大概bearing 就沖咗出去。行咗半分鐘後，都係唔好。又翻翻去start 打個準d 的bearing，再去。呢個point 衰距離感。我奇怪點解咁耐都未到，開始猶豫。落到去又平又密，真係好難知自己係邊。我諗住翻翻Start 再來過。行行下竟然撞翻出路。個下我笑咗lol 因為我翻翻去當初行去起點個條路，仲見到有d 人係度準備緊出發。

我去翻Start 後，再打過bearing。今次好小心好小心（不過睇翻GPS route都係錯錯地方向lol) 我一直去，希望撞到個大沼澤。

過完個沼澤，我見到個黃地就拿拿聲沖過去。哇 終於搵到你啦 

22分鐘。

Ei 都冇stage 1 咁誇張。第一個pt 一個鐘

宜家睇翻我係可以一開頭撞start 以南個個頂再撞沼澤，咁樣可能會好D. 

CP2 - 順（因為走路其實直線去完全無問題）

撞翻出路後，一直跑跑跑。又開始數水站（今次好小心數，確保唔會錯）

去到第五個，而且係大路交來。我攞啱方向就爬上去打CP2。

爬緊去搵CP2 (好斜)

CP3 - okay 

開頭走路（宜家睇第二條路係跑落林，再落沼澤）我未有信心跑林啦

經過個一大塊深綠，一到白色就入去。跟住D 斬樹個D 路入（宜家睇翻，可以用多d 呢塊林的2個頂）

我明明就到，但唔知乜事轉咗彎。（可能個指南針轉咗方向，而我又跟咗）我直頭行錯咗方向，跟住兜咗個圈，發現原來未到，繼續跟個d 路過去，入翻林，打Point

CP4 - 是日焦點（51分鐘）

開頭冇問題。

我過沼澤，用咗2個頂，用埋第三個頂就應該到架啦。我懶，唔想爬上去，諗住兜外圍，希望去到個超勁山咀,覺得可行啦。點知就出事啦

唔知自己去咗邊，因為個度直頭開咗條路出來（地圖冇顯示）搞到我猶豫。（睇翻GPS route 原來我個時好近個point，可能10-20米，不過好密，睇唔到）

比人開出來的路

我係個個Area 迴旋咗一陣，上上落落，翻翻去白林，見到其他人point 又開始諗自己係邊。我估自己係舊岩石度。再打bearing 落啦又翻翻去後先地圖冇個條路。來回咗個條路同舊岩石起碼2次。都係搵唔到CP4。

我嘗試係舊岩，問人where am I ，點知打親呢個point 都係跑得勁快個d 男人。根本問唔到佢地。

反而，有個男人問我係邊，我都唔好意思答佢，不過都要講，Sorry I am Lost too :(

ROAR 

呢個時候有D 肚餓 食D 野先

搵左我51分鐘的CP4 

我係白林度嘗試搵其他feature 定位。去到一個類似十字路口的地方停低，望下周圍，分析晒地形，figure out 到我係個坳度。（山之間）

好啦 我決定返回一開始個計劃。爬翻上一開始因為懶唔爬個個頂，再沿住個極斜山咀直線落。

又翻翻去個條路。地圖冇顯示個條路個Area 仲有塊望到天的空地，地圖又冇顯示。我好confused. 想問人，又企咗係度。有個勁nice 的姐姐指比我睇。原來我好近，一行過少少。Boom 終於到！

跟住有個日本姐姐問我係邊，我終於有一次答到人我指翻我個point，佢好感謝又走咗去。

CP5 - 美 （直線過）

不過好慢咁過去（驚錯呀）

CP6 - 索爆

我爬翻上去，經過沼澤，沿路睇住我懶得爬個個頂，翻翻去後先個坳，再沿個D 路，到

CP7 - 還可以

落翻去後先個坳，繼續去。經過翻後先到過無數次的岩，過沼澤過河。爬上頂，諗住過另外一個頂舊就到。我想試數步。點知數咗一半唔記得自己數到幾多。又翻翻轉頭，再來過。都唔準嘅lol 

我見到一個point， 但又唔係我個個。咁我問人我係邊，原來好近又行過少少，搵到

CP8 - Long Leg with lots of route choices 

Lost 完個51分鐘，唔想再冒險，馬上決定跑路。落山見到另外一座知方向錯，轉左撞到路，就馬上沖。

去到第一個水站，唔知搞乜野。實地見到係知要轉左繼續去，但個指南針指極都唔同地圖顯示個條路一樣方向。總之，極怪。

我停低，係咁自轉，奇怪緊搞乜野。

跟住水站個哥哥走過來問我洗唔洗幫手哎呀 連水站都lost 要人幫

唔係呀嘛 跟住佢指翻我知道個個水站，指埋我要行邊條路。（同我知道個條一樣，係個指南針直極都唔啱）

我答謝後，就唔理啦 照跑

一直跑，去到一塊黃地。我去到個塔，再打bearing 入林。撞另一條小徑，去到盡頭，打bearing 經沼澤邊入point。

宜家睇翻地圖。其實可以直線由CP7 沖過來又或者兜左邊路。究竟跑路快d 定直線過快d,究竟跑左邊定右邊快d, 一切見仁見智。

CP9 - beautiful 

本來一打完point 就想沖走。沖左幾步，都係唔好。又翻翻轉頭，打清楚beAring，再去。跳過河個下又好鬼型 到point 就打

唔講唔知，CP9後面就系傳說中的啡點。

全個賽區都系甘架啦，可想言之，啡點系有幾難搵。

而Course Setters 又偏偏好中意set point 落啡點

Last Control 

CP10 - last control 

沖翻落路，沖呀

爆盡衝去終點

Finish :) 

165分鐘。

對比Stage 1 （315分鐘）好左一半啦

班外國人系90分鐘內一定翻到lol (embarassed)

雖然今日個賽區同賽程簡單左，但開始見到技術的進步DD啦。
（大部分跑得幾順，系炒CP1同4）

係個指南針真係怪怪地。

不同定向會的旗桿在Arena 飄揚~

跑完翻來真系好肚餓架...我一翻到去佢地個餵食樣迎接我xD
(個個都食緊野)

而且好眼訓Zzzz (我沖完涼翻到去，個個訓曬覺lol) 

Hehe 跟住Rest Day :D 

O-ringen 2015 Stage 1: 挑戰的來臨

O-ringen 2015 Stage 1 

GPS route :  http://3drerun.worldofo.com/?id=-296917&type=info

比賽心情特別興奮，我仲早過個鬧鐘起身。穿上戰衣吃過早餐便開車到賽事中心。

係O-ringen 每個賽員都會被派到不同起點，一共8個，每個分別由不同贊助商命名。我的叫Cramo。

由賽事中心去起點有一點距離。

特別Cramo同Ellos （好慘架) 

咪，樂觀地諗係當熱身:) 

Cramo 平均每次都要行2公里幾去起點，短就1公里幾，最長4.4km 

同我條course 差不多長度

我預50分鐘jog 過起點

去個廁所 飲啖水 做個熱身 

就準備出發。 

拿起地圖沿著彩帶跑到起點control，其他同輩紛紛往CP1 去，而我就卻停下來望住地圖呆咗。究竟點去CP1 好呢？沿途完全冇任何特別顯著的攻擊點。最後，我決定撞向植物分界，沿住小徑去，再過河。去到呢度都頗順利，之後就出事啦。

Gps route 呢度畫唔準，
紅色圈或框系我attack 過或
到過的地方

我經過個塊相對上的平地，跟住開始唔知自己係邊我懷疑我攞錯bearing 行右咗，行下行下經過岩面地，見到好多石有塔, 但硬係定唔位。行來行去開始肚餓，結果randomly 揀舊石，爬上去坐低食野。(早有預備 哈哈️) 

我繼續行時 見到有個控制點。於是，留係度等人來打point 時，我就捉住佢問: Where am I? 佢個張1:10000圖同我張1:15000圖有明顯分別（我個張一有老花，肯定睇唔清楚d feature) 

最後都指到我係邊。（個時先知自己行過龍）奇怪在我企個個位明明係岩面地，佢係地圖係寫黃地。

我set bearing 好小心咁行翻過去第一個控制點。見到一個控制點，以為唔係。跟住撞到個香港人，再問，原來係我眼花，呢個就係我花咗成粒鐘先搵到的CP1! （好感動）

打完CP1, 拿拿臨繼續上路。用翻後先見到的控制點加塔做攻擊點，跟住方向岩，但又開始唔知係邊。沿途真係冇咩特別明顯的攻擊點，好難定位。但我見好多人都向同一個方向衝，咁應該岩掛。留意到地形變化，斜上去，令我肯定自己方向岩，但行極都未到，開始覺得唔對路，但又定唔到位。去到某個控制點，又有個好心人主動問我洗唔洗幫手。於是，我又發現原來自己走過龍。唯有打好bearing 沿途用不同攻擊點確保自己岩方向，最後終於比我搵到我睇緊點去CP3 時都有人問我係邊（不過咁又8個字）

CP3 我諗住撞禁區入大路再數水站入point。唔知點解個bearing 又打錯，又唔知去咗邊。有個差不多年紀的女仔問我係邊，逼於無奈的我都要答話唔知。但我地要去的方向係一樣，於是就一齊行。途中不斷觀察周圍嘗試定位，比我見到右邊有一塊頗大的黃地仲有個塔Tim 終於比我定到位。我同個女仔走到某個位要到各自的方向了。告別後，繼續上路。

入到大路後，我開始數水站。當我見到第一個水站時，想飲水，點知又冇杯又冇晒水。之後，仲有個女人問我知唔知我地係邊一個水站，我唔肯定，所以唯有答唔知。佢失望咁離開了。

我繼續跑，經過禁區經過幾個水站。我計劃就係第四個水站然後沿植物分界入。我認為到時，就打岩bearing 入去。就奇怪點解搵來搵去都搵唔到嘅。最令我哭笑不得係我行下行下又翻咗去禁區。姐係我兜咗個圈（睇翻GPS route 有好明顯的一個loop) 

冇計啦，唯有重新數過。跑到第三個時，我發現原來我後先數錯水站！去到第三個以為已經係第四個。唉 我冇野好講這低級錯誤我先犯得出。

去到第四個水站，我就再次打好bearing 就入。我最怕就係要搵啡點，因為最唔明顯係佢地。四圍都係小山丘咁架啦最終都比我搵到

我沿路撤返出翻去第四個水站，繼續走路數多3個水站就向南走。其實呢度有些太衝動，應該搵d 明確的攻

擊點咁走落去，我就咁憑一個bearing 好易走錯的。結果，我又唔知自己係邊啦。不過，我去到個沼澤就知唔可以再去, it is like a catching feature. 我知自己係大概邊個位，但我唔知我係exactly 邊個位。定咗幾次位都定唔到。後來我係個入沼澤的路口位到等（希望有人來救我) 結果，又真係有人主動問我洗唔洗幫手。當我知道原來我係Cp4 以西的沼澤與密林交界後，我就打好bearing 慢慢平con 過到去CP4

我打完CP4, 翻翻去後先問人個交界點越過沼澤撞入水站+救護站。之後，由於林太密及穩陣起見（唔想再lost 啦），我選擇向南走路，第一個路口轉右繼續跑去到山頂with 2舊石之間個位落CP5。點知又落錯咗方向。我知我知你聽咗我呢句好多次，又落錯bearing 了。我又唔知自己去咗邊。我行下行下見到個控制點，好興奮走過去，點知唔係我個個。（呢個情況經常發生 唉）我唔知點算。呢個時候有人經過，話比我知我個point 就係後面。我話：「真係架？唔該晒！」跟住，佢就走咗。但我醒起，我唔記得問佢咁究竟我自己係邊。relocate 唔到自己係邊又點搵個point. 

呢個時候真係有少少崩潰。明知個point 好近自己，但又搵極都搵唔到。唯有翻去個不屬於我的控制點嘗試定位。（通常一個控制點都會set 係某特別feature)  都係唔得。

於是，又等人來救濟。

頭2個唔采我lol 跟住終於有人理我。原來我係圓心西南面的植物分界。（我完全唔覺係植物分界lol 好密，雖然又的確吉咗塊空地出來。）我向東北走（我後先亂行時都有行過呢個方向）原來只要我再行多少少就到了

Argh 見到個控制點個刻，真係感動到先想喊出來

當時Scan Map 出錯, scan 唔曬。總之，我行左好遠之後再行翻轉頭

至於去CP6,我計劃係撞落水站，之後行翻轉頭。我最後的確有撞落路，但out of my expectation，點行都撞唔到水站。我唔知自己撞咗落邊條路度。（呢個範圍多路）我以為自己係有水站個條大路度，所以我認為只要我一直向西行一定撞到水站啦 點知搵極都冇。開始覺得唔對路，冇再繼續行，調頭行翻轉頭，觀察四圍定位。行下行下見到個分叉路口。我停低開始諗究竟自己係地圖邊個分叉路口。呢個時候有2個女人跑緊落來。佢地見到我個無助可憐樣一齊停低幫我。當我知道自己係邊個junction 後，馬上向東跑。終於比我搵到說好的水站。

於是，我再調頭走。係個路口攞岩bearing 慢慢超級小心入。打完CP6 就拿拿聲走人。

由於已經跑咗4個鐘，我唔想再冒險，全部儘量走路，一路跑去到CP7 東北的明顯山頂停低。由於唔想再踩沼澤，再跑完幾步先開始入point. 我不斷回望個山頂以保持正確方向。我好小心慢慢行入point。打完拿拿聲走人跑去last control. 咩都唔理攞岩方向就喪跑。

見到最後一個控制點，不禁感嘆，終於進入終點跑道。呢340米雖不長，但考驗到心理上的堅持。真的很累，很想停下來，但告訴自己快完了快完了，不要停。進入屬於自己的終點跑道，眼裏只有盡頭的終點。

完了。

一切終於都完了。

Stage 1 : 4hr 43min 

諗翻起都唔敢相信自己完成到。

成篇野佈滿「我唔知自己係邊」

「錯方向」「走過龍」

That's the fun part of orienteering,right? Xd 

從來未玩過呢個難度的course.

香港W20都唔會去到呢個level. 

能夠完成那天的賽程帶給我成功感

準備迎接剩下4天的比賽。

Anyway, that's it :) 

Mission Accomplished ️